Ginkumpirma sang Office of the Ombudsman ang rekomendasyon sang Department of Justice (DOJ) nga magpasaka sang kaso nga plunder batok kay Senador Jinggoy Estrada kag iban pa nga mga opisyal, may kaangtanan sa ginaalegar maanomaliya nga flood control projects.
Suno kay Assistant Ombudsman Mico Clavano, isa si Estrada sa “primary respondents” nga ginhingadlan sa DOJ resolution.
“Ang mga primary respondents nga ginhingadlan sa resolusyon sang DOJ nagalakip kay Senador Jose ‘Jinggoy’ Ejercito Estrada.
Nalakip man sa listahan sang DOJ si anay Department of Public Works and Highways Secretary Manny Bonoan.
Apang nagpamalibad naman si Estrada nga maghatag sang komento sa kaso nga plunder.
Matandaan nga magluwas kay Estrada, una na nga gin-anunsyo sang Ombudsman ang ginapreparar nga kaso batok kay Sen. Chiz Escudero kag anay House Speaker kag Leyte 1st District Rep. Martin Romualdez.
Sa mga senador subong kag sadto, si anay Sen Bong Revilla lang ang nadakpan may kaangtanan sa ginaalegar maanomaliya sa flood control projects.
