Gin-engganyo ni Senador Panfilo “Ping” Lacson sa Malacañang nga palaparon ang sakop sang “Sumbong sa Pangulo” nga website agud masakop indi lamang ang mga proyekto sa pagkontrol sang baha, kundi pati na ang iban pa nga mga anomaliya nga proyekto sa imprastraktura sa bug-os nga pungsod.
Matapos ang pagbuyagyag sang mga ghost projects, depektibo nga mga imprastraktura kag sub-standard nga mga pasilidad, nagbaha ang mga reklamo sa mga opisina sang gobyerno.
Suno sa senador, dako ang nabulig sang website sa pagbuyagyag sang mga ghost projects kag sa pagtumod sang 15 ka mga kontraktor nga gina-alegar nag-embezzle sang 20% sang kabug-usan nga balor sang flood control contracts.
Ginpangabay sini nga ilakip sa website ang iban pa nga mga proyekto pareho sang mga dalan, taytay, flyover, kag iban pa nga imprastraktura agud mas mapasanyog ang transparency kag accountability.
Ginsambit man ni Lacson nga nangin indi ma-access ang website sang Department of Public Works and Highways (DPWH) sa tagsa ka tion nga may yara sang budget deliberations ukon kontrobersyal nga mga isyu, butang nga iya ginadudahan nga hungod.
Sa bahin sang Malacañang, ginpahayag ni Undersecretary Claire Castro nga ginkalipay ang suhestyon ni Lacson kag suno sa iya bukas ang administrasyon sa anuman nga impormasyon nga makabulig sa pagbuyagyag sang korapsyon sa mga pampubliko nga proyekto.
Ginlunsar sang Agosto 11, 2025, ang “Sumbong sa Pangulo” nga website nagapahanugot sa publiko nga magreport sang mga iregularidad sa mga proyekto sa pagkontrol sang baha.
Sa una nga semana lamang, ang sistema nakabaton sang kapin sa 2,000 ka mga reklamo.
Ang website mahimo magpakita sang lokasyon, kontraktor, gasto, kag petsa sang pagtapos sang tagsa ka proyekto.
