Nagpanawagan si Senator Loren Legarda sang mas mabaskog nga proteksyon para sa mga mamamahayag kag media workers kadungan sang pagsaulog sang pungsod sang National Press Freedom Day.
Ginhatagan pagtamod ni Legarda nga kinahanglanon ang hilway kag safe nga press agud mapasiguro ang kinamatarong sang publiko sa husto, nagakaigo sa tion, kag masaligan nga impormasyon.
Suno sa senador, nagapabilin nga pagpanghangkat sa mga mamamahayag ang mga sala nga impormasyon, disinformation, kag ang paglapta sang wala napamatud-an nga mga pahayag sa social media.
Ginhatagan man niya sang importansya ang responsibilidad sang mga opisyal sang gobyerno kag mga institusyon sa pagsiguro nga ang impormasyon nga ila ginapaguwa nabase sa ebidensya kag maathag nga nagapatuhay sang mga alegasyon gikan sa napamatud-an nga mga kamatuoran.
Nagpaandam man si Legarda batok sa trial by publicity nga nagasiling nga mahimo ini makaguba sang pagsalig sang publiko sa media kag mga institusyon.
Suno sa senador, dapat hatagan sang nagakaigo nga proteksyon ang mga journalists ilabi na ang mga nagatrabaho sa mga probinsya kag high-risk areas agud epektibo nila nga matuman ang ila katungdanan sa publiko.
