Nagpanawagan si Senador Panfilo Lacson sang maid-id, may ebidensya, kag wala sang pagpanghilabot nga imbestigasyon sa flood control projects, kasunod sang report ni Ombudsman Jesus Crispin Remulla nga naga-alegar nga gintuyo sang Taguig City Hall nga punggan ang ila pagpangusisa.
Suno kay Lacson, ang imbestigasyon sa mga maanomaliya nga may kaangtanan sa flood control projects kag iban pa nga mga komplikado nga kaso sang korapsyon dapat planado, sistematiko, kag maid-id.
Samtang, ginpahayag ni Senador Alan Peter Cayetano nga samtang may ikasarang siya sa pag-address sa mga alegasyon ni Lacson, mas ginapakamaayo sini nga ihatag ang iya tion sa pagsabat sa mga kinahanglanon sang mga Pilipino, partikular na ang mga biktima sang baha.
Una na nga ginreport ni Remulla nga may isa ka empleyado sang Taguig City Government nga ginpahayag nagtinguha nga punggan ang mga imbestigador sang Ombudsman sa paggamit sang drone agud magkuha sang mga laragway sang lugar.
Apang gin-athag sang Taguig LGU nga wala ini ginabalabagan ang imbestigasyon, kon sa diin ginpahayag nga ang mga tinawo gikan sa ila Public Order and Safety Office ang nagahimo lamang sang ila katungdanan sang nakit-an ang mga tinawo sang Ombudsman nga nagapatigayon sang drone operation sa higad sang C-6 Road.
Ginreport nga nagluntad ang mainit nga pagbaisay, apang ang bagay nasolbar gilayon, kag wala sang reklamo nga ginpasaka.
