Ginpanindugan ni Senador Francis “Kiko” Pangilinan ang hugot nga paghalong kag pagpatuman sang nagakaigo nga penalidad sa mga hoarders, price exploiters kag food cartels sa atubang sang pamahog sang malala nga El Niño nga mahimo magpanubo sang produksyon sa agrikultura kag magpataas sang presyo sang nagapanguna nga mga balaklon.
Bilang chairman sang Senate Committee on Agriculture, nagpanawagan si Pangilinan sa Department of Trade and Industry (DTI), Department of Agriculture (DA), Price Coordinating Council (PCC) kag iban pa nga natungdan nga ahensya nga pasangkaron ang monitoring sa mga merkado kag siguraduhon nga ipatuman ang price freeze sa mga lugar nga gindeklarar sa state of calamity.
Sa idalom sang Republic Act 7581 ukon ang Price Act, nga gin-amyendahan sang Republic Act 10623, ang isa ka pag-freeze sang presyo awtomatiko nga gina-aplikar sa mga nagapanguna nga mga balaklon sa mga lugar nga gindeklarar sa isa ka estado sang kalamidad.
Ginhatagan pagtamod ni Pangilinan nga dapat imbestigahan kag pasakaan sang kaso kriminal kag administratibo ang mga indibidwal kag kompaniya nga involved sa supply concealment, price exploitation kag market manipulation.
Suno sa iya, indi lang vendors ang dapat manabat, kundi lakip na ang mga tag-iya sang dalagko nga negosyo sa likod sang mga sindikato.
Dugang pa sang senador, dapat siguraduhon sang gobyerno ang nagakaigo nga supply sang pagkaon kag hugot nga bantayan ang presyo sini agud maproteksyunan ang mga konsumidor, ilabi na sa atubang sang katalagman nga dal-on sang El Niño sa produksyon sa agrikultura.
