Magkaupod nga naggwa sa compound sang Senado sanday Senador Ronald “Bato” dela Rosa kag Senador Robinhood Padilla matapos ang sunod-sunod nga lupok nga nagluntad sa sulod sang senate building sang gab-i sang Miyerkules, Mayo 13.
Suno kay Senate Sergeant-at-Arms Mao Aplasca, makita sa CCTV footage kag Senate security reports nga naglakat lang ang duha ka senador padulong sa salakyan ni Padilla.
Apang, magapatigayon sa gihapon ang imbestigasyon kon ngaa wala sila ginpunggan sang mga security personnel.
Gin-athag man ni Senate President Alan Peter Cayetano, nga wala sang legal nga basehan agud punggan ang senador nga makagwa sa senado, bisan pa nga yara ini sa protective custody.
Ginpakigbahin man ni Cayetano nga nakaistorya niya ang asawa ni Dela Rosa, nga nagpangayo sang pasaylo sa gamo nga gintuga kag nagpaathag nga naghalin ang senador agud protektahan ang kabuhi sang iya mga kaupdanan kag empleyado.
Sa subong, wala pa sang impormasyon si Cayetano sa nahamtangan ni Dela Rosa, apang padayon ang ila pagpangamuyo para sa kaluwasan sang senador.
