Ginhingyo ni Senadora Risa Hontiveros sa Senado kag Kamara nga ipasar ang minimum wage hike bill—sa diin ginhatagan pagtamod sang senador nga indi ini dapat pagpabay-an subong nga nagahingapos na ang ika-19 nga Kongreso.
Ginhatagan pagtamod ni Hontiveros nga duha na lang ka session ang nabilin sa karon nga Kongreso kag dapat istoryahan ang hagna nga magahatag sang dugang sa sweldo sang mga minimum wage workers sa pribado nga sektor.
Gindugang pa sang senadora nga dapat ipatawag ang bicameral conference committee agud mapasag-uli ang nagkalain-lain nga probisyon sang House kag Senate versions sang minimum wage bill.
Nagpanawagan man ang mamalidha sa iya mga kaupdanan nga senador ilabi na kay Senate President Francis “Chiz” Escudero nga gilayon nga aksyonan ang ini nga isyu.
Ginhatagan pagtamod sang senadora nga sa tunga sang isyu sang impeachment, dapat hatagan sang pareho nga importansya ang ini nga isyu, bangud madamo nga mga trabahador nga nagakita sang minimum ang nagasandig diri.
