Sa boto nga 17-0, gin-aprubahan sang Senado ang Senate Bill No. 2426, ukon ang ginaproponer nga Comprehensive School Safety Act, sa third and final reading.
Tinutuyo sang proposal nga pabaskugon ang mga tikang agud masiguro ang kaluwasan kag seguridad sa mga eskwelahan, lakip na ang pag-amlig sa mga estudyante, manunudlo kag iban pa nga katapo sang komunidad sang eskwelahan.
Lakip sa mga butang nga ginaduso sini amo ang pagpatuman sang learner protection program kag mas organisado nga sistema sa pagkilala, pagtapna kag pagsabat sa mga pamahog sa sulod kag sa palibot sang mga eskwelahan.
Nahibaluan nga ginduso ang proposal kasunod sang narecord nga mga insidente sang kalakasan kag pagpangluthang nga nakaapekto sa mga eskwelahan kag mga estudyante.
Matapos ang pag-apruba sa Senado, kinahanglan pa nga mag-agi sa masunod nga mga proseso sa lehislatura antes ini mangin laye.
