Indi pag-ilakip sang Senate Blue Ribbon Committee si Former House Speaker kag Leyte 1st District Rep. Martin Romualdez sa ila revised partial report sa mga indibidwal nga irekomendar para sa preliminary investigation may kaangtanan sa kontrobersiya sa flood control projects. Sa baylo, padayunon sang komitiba ang pagtipon sang mga ebidensya kag posible case build-up batuk sa pakaisa ni President Ferdinand Marcos Jr.
Suno kay Senate President Pro Tempore Panfilo Lacson, chairman sang nasambit nga komitiba, iya ginpahayag nga kulang pa sang solid nga ebidensya nga direkta nga naga-angut kay Romualdez sa ginaalegar iregularidad.
Dugang pa sini nga limitado lang sa fact-finding kag financial scrutiny ang rekomendasyon batok kay Romualdez.
Ginrekomendar man sang komitiba nga magpatigayon sang monitoring ang Anti-Money Laundering Council (AMLC) sa mga hulag sang account sini.
Sa subong, nakabase lamang ang aksyon sang komitiba sa testimonya sang kontrobersyal nga witness nga si Orly Guteza, nga nagsiling nga personal niya nga gindala ang isa ka maleta sang kwarta sa balay nanday Romualdez kag anay kongresista nga Zaldy Co, Apang hugot nga ginpanginwala sang duha ang akusasyon.
Ginklaro ni Lacson nga posible magbag-o ang status ni Romualdez sa pinal nga report kon magtuhaw ang corroborating evidence.
