Magapadala naman sang liwat nga imbitasyon ang Senate Blue Ribbon Committee sa mga ginapahayag mga mamalidha nga involve sa nagapadayon nga imbestigasyon may kaangtanan sa mga maanomaliya nga flood control projects.
Kadungan sini, nagpasalig si Blue Ribbon Committee chair kag Senate President Pro Tempore Panfilo Lacson nga magapadayon ang ila hearing agud mahibaluan ang bug-os nga kamatuoran sa nasambit nga isyu.
Isa sa mga gin-imbitar liwat amo si anay House Speaker Martin Romualdez nga makaduha na ka beses nga ginpadal-an sang imbitasyon apang wala sa gihapon nakatambong sa hearing.
Gin-athag ni Lacson nga indi mahimo nga mapilitan ang mga katapo sang Kamara nga magtambong sa mga hearings sang Senado bangud sa nagaluntad nga “inter-parliamentary courtesy,” isa sa mga wala nasulat nga polisa sang pagtahod sa tunga sang duha ka mga kamara sang Kongreso.
Samtang, nagapabilin nga pending ang imbitasyon para kay former Ilocos Sur Governor Chavit Singson nga tubtob subong wala pa nakasumite sang affidavit sa pihak sang una sini nga pahayag nga handa na ini nga magtestigo.
