Natalana nga magapaguwa sang pre-trial order ang Senate impeachment court sa kaso nga impeachment batok kay Vice President Sara Duterte sa Lunes, Hunyo 29.
Suno kay Senate impeachment court clerk Renato Bantug Jr., ginsuguran na nila ang pag-draft sang pre-trial order kag nagpaguwa na sang advisory memorandum si Senate President Sherwin Gatchalian sa mga senador angut sa pag-issue sang pre-trial order sa masunod nga semana.
Dugang pa ni Bantug nga paga-ubrahon ini sang mga tinawo sang impeachment court tubtob sa katapusan sang semana agud nga ma-issue na ang pre-trial order sa Lunes.
Ang pre-trial order ang magaserbe nga giya ukon ‘roadmap’ para sa impeachment trial ni VP Sara kon sa diin pagabinagbinagon ang mga posisyon sang House prosecution panel kag defense team kon parte sa mga kamatuoran, mga testigo, kag mga petsa sang trial may kaangtanan sa kaso.
Una nga hatagan sang kopya sang dokumento ang magtimbang nga partido tubtub sa Miyerkules, Hulyo 1 agud magpaguwa sang ila tagsa ka komento.
Ginpasalig ni Bantug nga sarang matapos ang tanan antes magsugod ang impeachment trial batok kay VP Sara sa Hulyo 6.
