Pagapangunahan ni Senate President Pro Tempore Ping Lacson ang imbestigasyon sang Senate Blue Ribbon Committee sa maanomaliya nga flood control projects sa pungsod.
Ini matapos ginkumpirmar ni Senate President Vicente Sotto III nga magabulos si Lacson kay Senador Rodante Marcoleta bilang chairman sang komitiba.
Gin-athag ni Sotto nga indi miyembro sang majority bloc si Marcoleta kag ang Blue Ribbon Committee ang para lamang sa mayoriya.
Suno sa iya, wala sang nagaluntad nga mga pagsulundan, bisan sa Blue Ribbon Committee Charter ukon sa pangkabilugan nga Senate Rules, ang nagasiling nga ang chairman sang Blue Ribbon Committee dapat isa ka abogado.
Pahayag pa sini, bastante lamang nga mga katapo sang mayoriya ang kinahanglanon nga kwalipikasyon sa pagpamuno sa nasambit nga gamhanan nga komitiba.
Samtang, naghatag sang halimbawa si Sotto nga sadtong 9th Congress, ginpili nila si Senador Sonny Alvarez bilang chairman sang Blue Ribbon Committee bisan indi ini abogado.
Dugang pa sang Senate President, ang mangin isa ka abogado ang indi garantiya nga mangin isa ka maayo nga imbestigador. Suno sa iya, mas maayo si Lacson kon imbestigasyon ang pagahambalan.
Apang, suno kay Sotto, magapabilin si Senador Sherwin Gatchalian bilang chairman sang Committee on Finance nga amo ang magapanguna sa imbestigasyon sa ginaduso nga national fund para sa tuig 2026.
