Kumpyansa si Senate President Vicente “Tito” Sotto III nga yara sa gihapon ang suporta sang mayorya sang mga senador sa iya kasunod sang mga reports nga pila sa mga kaupdanan sini ang nagapalano nga magbiya sa majority bloc.
Ini kasunod sang mga impormasyon nga may yara na naman sang patigayunon nga reorganization sa Senado.
Samtang, wala naman sang ihibalo si Senator Erwin Tulfo kun may mga plano nga pahalinon sa pwesto si Sotto.
Pahayag ni Tulfo, wala man sang may nagtawag sa iya ukon nag-istorya sa iya nahanungod sa nasambit nga plano.
Apang gin-ako sang senador nga may mga nabatian siya nga sentimyento halin sa mga kaupod man nila nga nasuboan bangud senador ang masami ginaangot sa kurapsyon sang flood control issue kag wala man lang sang iban nga congressman nga ginapangalanan.
Una naman nga nagpabutyag sang pagkadismaya si Senator JV Ejercito nga daw ginkalimtan na lang sang Senado ang matuod-tuod nga may sala sa iregularidad sa flood control projects kag nagpahayag man ini sang plano nga magbiya sa majority bloc.
Nahibaluan nga nag-resign na bilang Chairman sang Senate Blue Ribbon Committee si Senate President Pro Tempore Panfilo ‘Ping’ Lacson bangud sa nabaton sini nga reports nga wala na nalipay ang pila ka mga senador sa iya pagdumala sa imbestigasyon sang flood control anomalies.
