Hugot nga ginpanginwala ni Senate President Vicente ”Tito” Sotto III ang pahayag ni anay presidential legal counsel nga si Atty. Salvador Panelo nga may mga senador nga ginpahayag nagdesisyon batuk sa natalana nga impeachment trial ni Vice President Sara Duterte.
Suno kay Sotto, magapabilin nga fair kag impartial ang Senado sa hearing, kag hulaton nila ang mga ebidensya nga igapresentar sa impeachment proceedings.
Una diri, ginpahayag ni Panelo nga ginpahayag nga nagdesisyon na sanday Sotto kag Senador Panfilo Lacson, Sen. Risa Hontiveros, kag Sen. Francis Pangilinan sa pagboto sa impeachment trial sang Bise Presidente.
Magluwas sini, ginapreparar naman sang Senado ang posible pagsaylo sang Articles of Impeachment gikan sa Kamara.
Suno kay Sotto, may yara man sila sang di-pormal nga dinner meeting upod sa pila ka mga katapo sang majority bloc agud istoryahan ang ginapaabot nga legal kag political proceedings, apang ginklaro sini nga indi ini isa ka opisyal nga caucus.
Ginpahayag man sini nga gina-review niya sa karon ang mga legal nga proseso bilang preparasyon sa iya papel bilang presiding officer sang impeachment court.
Samtang, nagapangatubang naman sang reklamo si VP Sara nga pagluib sa pagsalig sang publiko kag ginaalegar misuse of confidential funds.
Madumduman nga ginmanduan sang Commission on Audit (COA) ang Office of the Vice President nga ibalik ang ginabulubanta P448.2 million nga confidential funds nga ginkwestyon bangud sa ginaalegar iregularidad. Lakip diri ang cash advances kag iban pa nga gasto sa 2023, samtang ang dugang nga P300 milyones ang una na nga gindeklarar nga disallowed with finality.
