Ginpakigbahin ni Senator Ronald “Bato” dela Rosa nga isa sa mga rason kon ngaa liwat ini nga nagtuhaw kag nagbalik sa trabaho makaligad ang pila ka bulan nga pagpanago amo ang bangud sang iya kahuy-anan sa publiko.
Suno kay dela Rosa, madamo kuno sang mga importante nga bagay sa senado nga nagakinahanglan sang iya presensya, lakip na ang pagbag-o sang liderato sang senado kag ang nagahilapit nga pagpungko sini bilang impeachment court kon ipadala ang mga articles of impeachment.
Magluwas sini, ginpahayag sang senador nga naapektuhan siya sang mga komento sang publiko nga ginaalegar nga nagabaton siya sang sweldo bisan wala siya nagapakita kag wala nagatrabaho.
Ginpanindugan sini, indi niya batasan ang magbaton sang bayad nga wala sang katumbas nga serbisyo gani nagdesisyon siya nga magbalik sa trabaho.
Sa pihak nga bahin, gin-ako ni Dela Rosa nga nagpanago siya matapos makabaton sang impormasyon angut sa nasambit nga warrant bangud ginaalegar yara sa katalagman ang iya kabuhi.
Sa subong, yara ini sa protective custody sang Senado samtang ginahulat ang desisyon sang Korte Suprema may kaangtanan sa mga petisyon nga ila ginpasaka.
