Nangin emosyonal si Senador Ronald “Bato” Dela Rosa sa Senate plenary sang ginhingyo sini ang interim release ni anay Presidente Rodrigo Duterte, kasunod sang gin-alegar nga “welfare check” nga iya nabaton samtang preso ini sa International Criminal Court (ICC) sa The Hague, Netherlands.
Suno kay Vice President Sara Duterte, ang nasambit nga welfare check ang ginpatigayon sang mga personnel halin sa Philippine Embassy sa The Hague.
Suno sa senador, sin-o sila nga magpatigayon sang welfare check sa isa ka tawo nga ginsungka sang gobyerno kag ginpreso sa ICC?
Ginpanindugan ni Dela Rosa, kun ini isa bala ka welfare check, ukon isa ka operasyon nga may katuyuan nga mapalip-ot ang kabuhi ni anay Presidente Duterte kag kon sin-o nga welfare ang ginatinguhaan nga mapaayo sang karon nga administrasyon?
Dugang pa sini, posible nagtuga lamang ini sang dugang nga kaakig kag emotional stress sa anay Presidente.
Bilang sabat, nagpanawagan ang senador sa Senado nga ilakip sa agenda ang Proposed Senate Resolution No.18, nga nagatinguha nga iduso ang interim release ni anay Presidente Duterte sa ICC, ilabi na nga nagahilapit na ang Christmas season.
Katuyuan sang resolusyon nga mag stand by ang Senado kag suportahan ang panawagan nga ipaidalom sa house arrest si Duterte.
Gintapos sang senador ang iya speech pinaagi sa panawagan nga ipakita ang pag-ulikid kag pagtahod sa madugay na nga lider sang pungsod.
