Luyag ni Senator Francis “Chiz” Escudero nga buhinan ang P250.8-billion nga pondo para sa flood control projects sang Department of Public Works and Highways agud nga madula amat-amat ang posibilidad sang kurapsyon sa ahensya.
Suno kay Escudero, P13 billion lang ang pondo para sa mga bag-o nga classrooms samtang nagabaha naman ang pondo para sa flood control– mas dako pa sa pondo para sa bag-o nga mga dalan kag lima ka pilo ang kadakuon sang budget kun ipaanggid sa pondo para sa bag-o nga mga taytay.
Dugang pa sang senador, mas maayo nga ang pondo nga ibuhin sa flood control budget ang italana na lang para sa mga sektor sang edukasyon, ikaayong lawas kag food production.
Nahibaluan nga base sa findings sang Philippine Center for Investigative Journalism, nagguwa ang mga pangalan nanday Senators Escudero, Joel Villanueva kag Christopher “Bong” Go nga may yara sang ginaalegar koneksyon sa mga contractor.
