Ginkumpirmar ni Senador Ronald “Bato” dela Rosa nga naghalin sa iya talatapan ang circulating copy sang draft Senate resolution nga ibasura ang impeachment case batuk kay Vice President Sara Duterte.
Suno kay dela Rosa, siya ang nag-umpisa sang resolusyon.
Ginkumpirmar man sang senador nga may mga senador nga nagasuporta sa resolusyon apang wala sini ginbuyagyag ang numero.
Samtang, nakabaton naman sang physical copy si Senate President Pro Tempore Jinggoy Estrada sang draft Senate resolution nga nagahingyo nga ibasura ang impeachment case batok kay Duterte.
Sa isa ka interview, ginpahayag ni Estrada nga Lunes pa lang nga naglapta ang resolusyon.
Ginklaro sang senador nga wala siya ginpangabay nga pirmahan ang resolusyon kundi ginpangabay lamang nga basahon, apang ginpahayag sini nga iya pamensaron sang maayo kon pirmahan ini.
Suno kay Marcos, ini na ang ikatlo nga kaangay nga resolusyon nga iya nakita nga nagatinguha nga ibasura ang pagbista batuk sa ikaduha nga presidente sang pungsod.
Ginhatagan pagtamod sang senador nga ang tanan nga bersyon sang resolusyon nagapangita sang pinaka-epektibo kag legal nga solusyon sa impeachment ni Duterte.
Samtang para naman kay Senate President Francis “Chiz” Escudero, makabig nga inutil nga papel ang nagalapta nga kopya sang draft Senate resolution nga nagatinguha nga ibasura ang impeachment case batuk kay VP Sara.
Suno sa senador, makahimo lamang sila sang aksyon sa pagdebate kag pagboto sa nasambit nga resolusyon sa tion nga may mag-file kag maghimo sang motion.
Base sa nagalapta nga apat ka pahina sang Senate resolution, wala sang nalista nga ngalan sang mga senador kag wala man ini sang Senate resolution number.
Nasaad sa titulo sang resolusyon ang deklarasyon sang De Facto Dismissal sang kaso nga impeachment batuk kay VP Sara Duterte suno sa validity sang 1987 Constitution.
