Dismayado ang pila ka mga mamalidha sa sunod-sunod nga pagbiya sa pwesto sang mga opisyal sang Independent Commission for Infrastructure (ICI) nga naga-imbestigar sa flood control scandal.
Para kay Sen. Francis ‘Kiko’ Pangilinan, bisan wala pa natapos ang trabaho sang Independent Commission for Infrastructure (ICI), daw pareho na lang ini nga “good as abolished” tungod sa sunod-sunod nga resignation sa nasambit nga talatapan.
Daku man ang kakibot ni House Deputy Minority Leader Leila de Lima sa pahayag ni Ombudsman Jesus Crispin Remulla nga may isa tubtob duha ka bulan na lang ang Independent Commission for Infrastructure antes nga matapos ang operasyon sini.
Suno kay De Lima, sa idalum sang Section 10 sang Executive Order 94, ang Independent Commission for Infrastructure mahimo lang nga mangin ‘functus officio’ kon natapos na ang tinutuyo kun ngaman gintukod ini ukon luyag na ini buwagon sang Presidente.
Dugang pa niya, dapat pabay-an ang Commission nga magpadayon sa pagbaton sang ebidensya bisan nakahimo na ini sang rekomendasyon sa mga kaso sa Ombudsman ukon Department of Justice.
Naka-sulat man sa EO 94 nga obligasyon sang Independent Commission for Infrastructure nga maghatag sang rekomendasyon sa mga ahensya sang gobyerno agud malikawan nga maliwat ang amo nga kontrobersiya.
Apisar madamu ang nagbiya, nagapati si De Lima nga importante gihapon ang papel sang Independent Commission for Infrastructure sa paghatag sang transparency kag accountability sa mga proyekto sang gobyerno.
