Gintumod ni Senator Imee Marcos nga yara sa Luzon ang kadam-an sa lugar nga puntirya sang hypersonic missile sang China.
Suno kay Marcos, sa 25 ka lugar nga target sang missiles sang China, siyam diri ang mga EDCA sites nga ginpatukuran sang military bases para sa mga sundalo nga Pilipino kag Amerikano sa idalum sang Enhanced Defense Cooperation Agreement ukon EDCA.
Samtang, pito naman sa mga ini ang sub-sites sang EDCA samtang duha lang ang yara sa Mindanao nga makit-an sa Zamboanga kag Cagayan de Oro.
Ginpahayag ni Marcos nga indi lang klaro kun kaupod sini ang National Capital Region (NCR) apang malapit ini sa Cavite nga may kampo sang militar rason nga indi malayo nga maulamid pananglitan tinud-on sang China ang pagpuntirya sa pungsod gamit ang mga hypersonic missiles.
Ang nahibaluan nga plano ang may kaangtanan sa nagalala sa gihapon nga sitwasyon sang Pilipinas kag China sa West Philippine Sea (WPS).
