Gingamit ni Senator-judge Robin Padilla ang iya background bilang isa ka criminology graduate agud pamangkuton kon ano na nga stage ang imbestigasyon sang Anti-Money Laundering Council ukon AMLC sa mga makaduluda nga transaksyon may kaangtanan sa mga kompaniya nga may kaangtanan kay Vice President Sara Duterte.
Sa iya interjection sa ika-34 nga adlaw sang impeachment trial, ginplastar ni Padilla ang apat ka hugna nga suno sa iya kabahin sang proseso sang pagpatuman sang kasuguan lakip na ang inquiry, imbestigasyon, evaluation, kag konklusyon.
Bangud sini, ginpamangkot niya sa AMLC Executive Director Atty. Ronel Buenaventura kun sa diin yara ang ahensya sa nasambit nga proseso kag kon bala nakalab-ot na ini sa konklusyon sa mga transaksyon nga ila ginrepaso.
