Matigdas nga ginpanginwala ni Senator Nancy Binay ang akusasyon nga ginpungkuan niya sang pila ka bulan ang pagpatukod sang New Senate Building (NSB) sadtong siya pa ang Chairperson sang Senate Committee on Accounts.
Sa ginpatigayon nga pagsinapol sang Senado, ginsiling ni Senate Committee on Accounts Chairman Alan Peter Cayetano nga pila man ka bulan nga ginpungkuan ni Binay ang NSB rason agud madelayed ang proyekto apang hugot ini nga ginpanginwala sang senadora kag ma-id-id nila nga gintun-an suno diri ang mga dokumento kag wala lang ini nagahulat sa iya lamesa.
Bangud sini, malain ang buot sang Senadora sa alegasyon bangud duha ka beses sa isa ka semana kung talakayon ini sang iya komite kaupod ang iban pa nga ahensya nga may kaangtanan sa pagpatukod sang NSB.
Gin-ako man sini nga nasakitan siya bangud liwat nga nabuhi ang pilas nga sa iya pagdumdum nag-ayo na matapos ang natabo sadtong 2015 kung sa diin si Cayetano man ang nagpanguna sa imbestigasyon sang Senado angut sa Makati City Hall Parking Building nga proyekto sang iya amay nga si anay Vice President Jejomar Binay sang nagapungko pa ini bilang alkalde sang Makati.
