Hugot nga ginbalibaran ni Senador Panfilo “Ping” Lacson ang imbitasyon ni Senate Minority Leader Alan Peter Cayetano nga personal nga usisaon ang mga flood control projects sa Taguig matapos ang ila pagbayluhanay sang mga alegasyon.
Suno kay Lacson, magakadto siya sa syudad sa tion nga ma-fix na diri ang mga flood control projects.
Naglahog man ang senador nga madugay na ini nga wala makalangoy kag basi malumos siya sa baha sang Taguig.
Una diri, gin-agda ni Cayetano si Lacson kag ang iya mga tinawo nga magbisita sa Taguig agud makita mismo nga nahuman na ang flood control kag iban pa nga imprastraktura nga iya ginapabugal kag indi ghost projects.
Matandaan nga nagpatigayon sang kaugalingon nga fact-finding investigation si Lacson sa ginaalegar ghost infrastructure projects sa Taguig nga ginapahayag ginlakip ni Cayetano sa 2025 national budget.
Nag-ugat ang pagbayluhanay sang pahayag sa tunga sang duha ka senador matapos nga ginkwestyon ni Cayetano ang pagsaka sang Statement of Assets, Liabilities and Net Worth (SALN) ni Lacson.
Ginpanindugan ni Lacson nga gikan ini sa iya lehitimo nga mga negosyo sa mga panahon nga wala siya nagaserbe bilang senador.
