Nagapanawagan si Senator Risa Hontiveros sa gobyerno nga magpamati kag gilayon nga hatagan sang igtalupangod ang mga singgitan sang transport sector sa tunga sang padayon nga pagsaka sang presyo sang gatong.
Suno kay Hontiveros, madamo ang mga commuters nga nagasalig sa pampubliko nga transportasyon, apang naganubo naman ang numero sang mga public utility vehicles nga nagabyahe bangud sa kapierdihan sa ila sini nga kita.
Ginpahayag man sang Senador nga kulang ang temporaryo nga tikang kaangay sang pag-suspend sang excise tax kag nagpanindugan nga kinahanglan sang mas konkreto nga solusyon para sa amo nga sektor.
Gin-ako man sini nga kulang ang P5,000 nga subsidy para sa nasambit nga sektor kag dapat nga palaparon, ilabi na nga nagalab-ot sa ginabanta ₱1,000 ang kada adlaw nga kapierdihan sang isa ka traditional ukon modern nga jeepney unit.
Ginduso man sang senador paagi sa Senate Bill No. 1986 ang ₱52.8 billion nga subsidy package, lakip ang ₱12 billion para sa subsidiya sa transportasyon nga makabenepisyo sa mga PUV drivers, delivery riders kag TNVS drivers.
Nagpanawagan man ang natungdan nga padasigon ang pagpanagtag sang ayuda kag kuhaon ang mga sablag kaangay sang “first owner” rule nga suno sa iya nagapabudlay sa madamo nga mga operators.
Ginpanindugan man sini nga kinahanglan gilayon nga maghulag ang gobyerno agud malikawan ang mas malala nga epekto sa transport sector kag sa presyo sang mga balaklon.
