Ginpamatukan ni Senator Robin Padilla ang ruling ni Presiding Officer Chiz Escudero nga i-subpoena ang bank records nanday Vice President Sara Duterte kag Mans Carpio.
Suno kay Padilla, kun buksan ang records sang isa ka opisyal, dapat man ini himuon sa tanan agud mapakita sa publiko nga wala sang ginapangapinan ang gobyerno.
Una na nga gin-athag ni Presiding Officer Senator Francis “Chiz” Escudero nga ginpahanugutan ang subpoena bangud bastante ang kaangtanan sang mga ginapangayo nga mga dokumento sa mga alegasyon nga gina-istoryahan sa impeachment trial.
Sakop sang subpoena ang records sang bangko, BIR kag AMLC nanday VP Sara kag Mans Carpio, lakip na ang pag-usisa sa peso-denominated accounts sang 19 ka corporate entities nga may kaangtanan sa bise presidente.
Ginpanindugan man sang impeachment court nga indi makabig nga “fishing expedition” ang request sang prosecution bangud may yara sang bastante nga basehan ang ginahingyo nga mga dokumento.
