Ginrekomenda sang Field Investigation Bureau sang Ombudsman ang pagpasaka sang kaso nga plunder kag bribery batok kay Senator Rodante Marcoleta bangud sang ginaalegar pagbaton sang P75-million nga campaign donations sang nagligad nga tuig.
Base sa complaint-affidavit nga napetsahan Mayo 18, luyag man nga kasuhan si former Quezon City 2nd District Rep. Mike Defensor kag duha pa ka mga indibidwal nga gin-alegar naghatag sang donasyon kay Marcoleta.
Suno sa mga imbestigador, nagakadapat man nga mag-atubang si Marcoleta sang kaso nga indirect bribery may kaangtanan sa nasambit nga alegasyon.
Ginmanduan ang apat nga magpasa sang counter-affidavits sa preliminary investigation bilang kabahin sang preliminary investigation sang Ombudsman.
Matandaan nga sang nagligad nga tuig, may nauna na nga kaso sa Commission on Elections (Comelec) si Marcoleta kun sa diin gin-imbestigaran si Marcoleta bangud sa non-disclosure sang donation sa iya nga Statement of Contributions and Expenditures (SOCE).
Sang amo nga tion, wala nagrekomenda ang Comelec sang ano man nga kaso batok sa senador bangud suno sa poll body, ang non-disclosure ang wala na ginakonsidera nga election offense sa idalom sang gin-amyendaran nga Omnibus Election Code.
Sa pihak sini, padayon ang pagrepaso sang Ombudsman sa reklamo samtang ginahulat ang opisyal nga pahayag sang senador angut sa mga alegasyon.
