Personal nga ginbisita nanday Senators Robin Padilla kag Camille Villar ang mga pumuluyo sa Carcon Village evacuation center sa Barangay Lagao, General Santos City, kon sa diin nagpanghatag sila sang food packs, bugas, kag matinlo nga tubig para sa mga biktima sang kalamidad.
Sa ila pagbisita, nakig-angot man ang mga senador sa mga pumuluyo agud mahibaluan ang ila sitwasyon kag gilayon nga kinahanglanon pagkatapos sang linog.
Kasunod sini, nagpasakop man sila sa isa ka briefing kaupod si Sarangani Gov. Ruel Pacquiao kag iban pa nga mga opisyal agud masiguro ang madasig nga pagdul-ong sang mga relief goods sa mga apektado nga komunidad sa General Santos City kag Sarangani.
Suno sa mga opisyal, importante ang pag-isa kag pagbinuligay agud mapadasig ang pagbangon sang mga pamilya nga apektado sang kalamidad.
Padayon ang relief and rehabilitation efforts sang lokal nga panguluhan kag nagkalain-lain nga ahensya agud masabat ang mga kinahanglanon sang mga pumuluyo kag mabuligan sila nga makabangon gikan sa kahalitan nga gintuga sang linog.
