ROXAS CITY – Nagdangop sa Bombo Radyo ang isa ka senior citizen agud ireklamo ang wala pagkalakip sang iya pangalan sa mga makabaton sang social pension gikan sa Department of Social Welfare and Development sa banwa sang Panay.
Sa interview sang Bombo Radyo kay Merlita Bering, residente sang Barangay Bonga, Panay, ginpahayag sini nga humalin sang nag-edad siya sang 60 anyos tubtob karon nga naga-edad na ini sang 72 anyos, wala pa gid siya makabaton sang bulanan nga social pension.
Ginpahayag sini nga nagpadulong siya sa Metro Manila agud magpabulong kasunod sang iya pagka-stroke kag ginpahikot sini sa iya anak ang mga rekisitos agud makabaton ini sang social pension apang wala ginpahanugutan nga maggamit lamang ang iya anak sang authorization letter agud makabaton sang amo nga ayuda.
Suno diri nga ginhambalan sila nga tingbon sang hatag sa iya ang iya social pension nga wala sini mabaton sang pila ka tuig apang sang nakapauli na ini, wala man ini nagtupa.
Suno diri nga wala gid malakip ang iya pangalan sa listahan sang mga benepisyaryo kag ginpasalig nga kun may mapatay nga senior citizen sa ila banwa, diri pa lamang siya malakip sa listahan.
Apang suno sa iya nga madamo na sang nagkalamatay nga senior citizen sa ila banwa kag tubtob subong wala gihapon siya malakip sa mga benepisyaryo sang amo nga ayuda.
Dako kuntani suno kay Bering nga bulig ang nasambit nga bulig-pinansiyal para sa iya pang-adlaw-adlaw nga kinahanglanon kag bulong.
Bangud diri, ginpakamaayo na lamang ni Bering nga ipalab-ot sa Bombo Radyo ang amo nga problema sa paglaum nga gilayon ini nga maaksiyunan.
