Temporaryo nga nakahilway sa presuhan ang isa ka senior citizen matapos makapyansa bangud sa iligal nga paghupot sang armas sa Dao, Capiz.
Ang suspek amo si alyas El, 67- anyos kag residente sang Barangay Agtambi, Dao, Capiz.
Sa interview sang Bombo Radyo kay Police Captain Rey Contreras Dordas, Hepe sang Dao Municipal Police Station, iya ginpahayag nga sang tinalikdan nga Abril 21, ginpatigayon ang pagserbe sang search warrant nga gin-isyu ni Judge Lorencito B. Diaz, Executive Judge sang Regional Trial Court, Branch 17, sang Abril 17, 2026.
Suno kay Dordas, sa nasambit nga operasyon nakumpiska halin sa subject person ang caliber .38 revolver nga may apat ka live ammunitions kag isa ka itom nga belt bag.
Gilayon man ini nga gindala sa Dao Municipal Police Station para sa nagakaigo nga disposisyon antes ini nga makapyansa.
Dugang pa sang natungdan, apisar nakapyansa, magapadayon ang imbestigasyon kun sa diin posible magapangatubang ini sang kaso nga paglapas sa Republic Act 10591 ukon Comprehensive Firearms and Ammunition Regulation Act.
