Gaob sa guya ang naangkon sang isa ka senior citizen matapos ginsumbag sang isa ka driver sang motorsiklo nga ginapahayag yara sa impluwensya sang makahulubog nga ilimnon.
Ginkilala ang senior citizen kay Manolito Fuentes, 78-anyos nga residente sang Alvarez-Phil Railway Street, Roxas City.
Sa inisyal nga impormasyon nga nakuha sang Bombo News Team sa lugar, samtang ginasubay sang senior citizen ang dalanon sa Arnaldo Blvd. padulong sa sentro sang syudad sang hinali nga nabungguan ang likod nga porsyon sang iya ginamaneho nga tricycle.
Bangud sini, nanaog ang amo nga senior citizen sa pagdumdom nga magpangayo kun tani sang pasensya ang driver sang motorsiklo apang ginkakibot lang sini ang gulpi nga pagsumbag sa iya guya.
Desidido naman nga magreklamo ang senior citizen batuk sa driver suspek apang luyag man sini nga pasayluhon ang amo nga driver sang motorsiklo kun magpangayo ini sang pasensya.
Sa karon, nagapadayon pa ang imbestigasyon sang mga kapulisan angut sa nasambit nga insidente.
