PANAY CAPIZ – Ginbawian na sang kabuhi ang senior citizen nga nabungguan samtang nagatabok sa dalan sa Barangay Agbalo, Panay, Capiz.
Ini ang ginkumpirmar ni PCpt Ronald Ton-ogan hepe sang Panay Municipal Police Station, sang mainterview sang Bombo Radyo.
Mahibaluan nga ginkilala ang biktima kay Federico Bolante, 81-anyos kag residente sang Barangay Agbalo, Panay, Capiz samtang ang ginapahayag driver sang motorsiklo ang ginkilala kay John Paul Biclar 18-anyos kag residente sang Sitio Andaya, Barangay Tacas, Pontevedra, Capiz.
Suno kay PCpt. Ton-ogan, base sa mga nakakita sa lugar madasig ang pagpadalagan sang driver sang motorsiklo sang natabo ang insidente.
Matandaan nga nag-angkon sang pilas sa magkatuhay nga parte sang lawas ang biktima kag ginpadangat sa Roxas Memorial Provincial Hospital para sa pagbulong subong man ang driver naman sang motorsiklo nga ginpadangat naman sa isa ka pribado nga ospital.
Sa karun, wala pa nakahinala ang magtimbang nga bahin kun anu ang masunod nga desisyon matapos ang nasambit nga insidente.
Mensahe sini sa mga Panayanon, nga bangud mataas ang kaso sang vehicular accident sang ila banwa ipabilin nga maghalong samtang nagamaneho kag indi pagkalipatan nga magsuksok sang helmet sa tion nga magbyahe.
