ROXAS CITY – Wala sang kontra kag mabuot nga klase sang tawo ang senior citizen nga nasapwan-patay kag sunog ang lawas sa Barangay Matinabus, Sigma, Capiz.
Ini ang ginpahayag sang hinablos sang biktima nga si Riza Feca sang ma-interview sang Bombo Radyo.
Suno kay Riza, wala man nakaistorya ang iya tiyo nga may naakig sa iya. Pahayag pa sini nga posible pagpangawat ang tuyo sang suspek kun ngaa ginpatay ang iya tiyo bangud permi ginasukbit sang tiyo sini kun diin man magkadto ang iya belt bag nga dira nakabutang ang kwarta nga ginabulubanta yara sa P18,000.
Dugang pa sini nga nakaagi istorya ang iya tiyo nga may mga tion nga kun gab-i ginakawat ang iya mga hinuptan nga manok apang wala lang ini nagaguwa sa iya balay bangud nahadlok kun ano ang matabo.
Suno pa diri nga malayo ang pamalay sa naistaran sang iya tiyo kag ginabisitahan lang sang iya mga himata kun kis-a.
Matandaan nga nasapwan ang lawas sang senior citizen nga yara na sa state of decomposition sa Barangay Matinabus sa nasambit nga banwa.
Ginkilala ang amu nga senior citizen nga si Artemio Furingan Burias, 67-anyos kag residente sang Barangay Sta. Rita, Dumalag, Capiz.
Sa imbestigasyon sang Sigma PNP, nadiskubrehan sang utod sang biktima ang lawas sini matapos nga ila ginpangita bangud pila na ka adlaw nga wala makapauli sa ila balay. Dugang pa sang mga kapulisan nga posible ginpatay ang biktima kag ginsunog ang lawas sini.
Sa karon, nagapadayon pa ang imbestigasyon sang mga otoridad agud matumod ang motibo kag makilala ang suspek nga yara sa likod sang amu nga krimen.
