ROXAS CITY – Nakabalhag sang isa ka panibag-o nga napatay bangud sa COVID-19 ang probinsya sang Capiz.
Ini ang ginkumpirmar ni Mr. Joeffrey Espiritu, Management Officer IV kag tagpamaba sang Department of Health (DOH) –Capiz, sang mainterview sang Bombo Radyo.
Suno kay Espiritu, sandig sa pinakaulihi nga COVID-19 bulletin, ang napatay ang isa ka senior citizen kag residente sang Roxas City.
Nabakunahan naman suno diri apang nalakip sa mga person with comorbidities.
Nag-amat-amat man suno diri taas ang numero nga nagabalatian liwat sang COVID-19.
Sa karon, may yara na sang 44 nga aktibo nga kaso sang nasambit nga virus sa probinsya.
Mensahe ni Espiritu sa mga pumuluyo nga padayon sa gihapon magsuksok sang face mask bilang proteksyon sa iban pa nga balatian kag sa wala pa makapabakuna nga available sa gihapon ang bakuna.
