ROXAS CITY – Patay ang isa ka senior citizen matapos nga gin-igo sang kilat samtang nagapanglimpyo sa sulod sang iya puluy-an sa Sitio Calintong Sinamongan banwa sang Pilar, takna 4:00 sang hapon, Setyembre 10.
Ginkilala ang biktima kay Gloria Buendia, 63-anyos, mangunguma, residente sang nasambit nga lugar.
Sandig sa imbestigasyon ni PCpl. Jaypee Tomogda, samtang nagabubo ang mabaskog nga ulan, yara sa sulod sang balay ang mag-asawa nga Buendia nagapanglimpyo ang biktima samtang nagahigda naman ang bana sini sa pihak nga kuwarto.
Apang ginkakibot ni Danilo, ang mabaskog nga paglupok kag ginpadulungan ang lugar, nakit-an sini ang iya asawa nga nagahapa na, nagapangayo sang bulig kag may paso sa tiyan.
Ginpadangat pa sa RHU ang biktima apang gindeklarar nga dead on arrival.
Mahibaluan nga human sa light materials ang nasambit nga balay.
Sa karon, yara na sa punerarya ang bangkay sang biktima.
