Patay ang isa ka señior citizen matapos ginlabo sang iya kaugalingon nga apo sa Barangay Bitoon Ilaya, Cuartero, Capiz.
Ang biktima amo si alyas “Bon” samtang ang suspek amo si alyas “Josh”, 25-anyos, lunsay residente sang nasambit nga lugar.
Sa interview sang Bombo Radyo kay Police Captain Jesse Lepaña, Officer-in-Charge sang Cuartero Municipal Police Station, iya ginpahayag nga posible ginsumpong sang nervous breakdown ang suspek, rason nga nahimo sini ang krimen.
Suno kay Lepaña, matapos ang insidente sang pagpanglabo, gilayon nga nagpalagyo ang suspek apang natigayon nga nadakpan sa Jaro, Iloilo City.
Sa subong, yara na sa kustodiya sang Cuartero Municipal Police Station ang suspek para sa nagakaigo nga disposisyon kag pagpasaka sang kaso.
