ROXAS CITY – Patay ang Senior Citizen, matapos maaksidente ang ginamaneho sini nga motorsiklo sa Intungcan, Pontevedra, Capiz.
Ginkilala ang napatay nga si Dominador Deita 71-anyos kag residente sang nasambit nga barangay samtang ang driver naman sang motorsiklo nga Yamaha sniper ang ginkilala kay Arthur Cuñada, 36-anyos, nga residente sang Brgy. Casanayan Pilar, Capiz.
Sa impormasyon nga nakuha sang Bombo Radyo sa Pontevedra Municipal Police Station, ginapahayag nga samtang ginasubay ni Cuñada ang dalan sa nasambit nga lugar hinali lamang nga nagtabok si Deita rason sang ila pagkabunggo.
Bangud sa makusog nga impact, nag-angkon sang patal nga pilas sa magkatuhay nga parte sang lawas ang nasambit nga senior citizen samtang lunsay bali naman ang butkon ni Cuñada.
Madasig man ini ginrespondihan sang mga otoridad agud hatagan sang pauna nga pagbulong antes ginpandangat sa magkatuhay nga ospital apang gindeklarar nga dead on arrival si Deita.
Sa karun padayon nga ginabulong si Cuñada sa ospital.
