ROXAS CITY – Patay ang isa ka senior citizen samtang ginabulong sa isa ka pribado nga ospital sa syudad sang Roxas matapos aksidente nga nahulog sa isa ka depampasahero nga jeep sa Pueblo De Panay, Barangay Lawaan, Roxas City.
Ginkilala ang biktima kay Oliva Guevarra, 63 anyos sang Barangay Sto. Niño, Dumalag, Capiz.
Base sa imbestigasyon sang Roxas City PNP nga samtang ginamaneho sang driver nga si Norlito Devera, 38 anyos sang Tabuc Sur, Panitan, Capiz ang depampasahero nga jeep padulong kuntani sa Roxas City Integrated Transport Terminal sang hinali na lamang ini nakabati sang singgit gikan sa iya mga pasahero sa sulod sang jeep nga may yara sang nahulog nga isa ka tigulang.
Nahibaluan nga nagkuha sang P1,000 ang biktima sang hinali na lamang nga ginpalid sang mbaskog nga hangin ang iya sini kwarta.
Gintinguhaan pa sini nga kuhaon kuntani apang aksidente naman ini nga nahulog sa jeep.
Matapos nabatian sang driver nga may nahulog nga pasahero, gilayon man sini ginpapundo ang jeep.
Madasig naman nagresponde ang Capiz Emergency Response Team (CERT) kag gindala sa isa ka pribado nga ospital ang biktima.
Samtang, nagapabilin naman sa kustodiya sang mga kapulisan ang driver sang nasambit nga jeep.
