ROXAS CITY – Pilason ang isa ka senior citizen nga lalaki matapos mabungguan sang motorsiklo samtang nagatabuk sa National Highway, Barangay Poblacion Takas banwa sang Cuartero takna 2:00 subong nga hapon.
Ginkilala ang biktima kay Felix Roque Delfin, 84- anyos kag residente sang nasambit nga lugar.Samtang ang nakabunggo ang ginkilala kay Joheris Navarro, 31- anyos, call center agent kag residente sang Democracia Jaro, Iloilo City.
Sandig sa imbestigasyon sang Cuartero MPS, magatabok kuntani si Delfin sa karsada apang hinali nalang nga nabungguan sang motorsiklo nga ginamaneho ni Navarro rason nga natumba ang biktima sa karsada kag nag-angkon sang pilas sa ulo.
Ba-se sa panaysayon sang driver, mahinay ang pagpadalagan sini kag ginbusinahan ang magatabok kuntani nga biktima.
Madasig naman nga gindapatan sang pauna nga pagbulong sang Cuartero Emergency Response Unit (CERU) ang biktima kag gilayon ginpadangat sa Mambusao District hospital para sa nagakaigo nga pagbulong.
Samtang, ginkustodiya naman ang driver kag motorsiklo sini sa Cuartero MPS para sa nagakaigo nga disposiyon.
