ROXAS CITY – Pilason ang isa ka Senior Citizen matapos nga ginaalegar ginbungguan sang motorsiklo sa Rizal St., Barangay 7, Roxas City.
Ginkilala ang biktima nga si Rolando Camacho, 64-anyos sang nasambit nga barangay.
Base sa inisyal nga imbestigasyon sang mga kapulisan nga patabuk na kuntani ang biktima sang aksidente na lamang ini nabungguan sang motorsiklo nga ginamaneho ni Mark Anthony Ballos, 35-anyos sang Barangay Punta Tabuc sining siyudad.
Bangud diri, nag-angkon sang mga kasamaran sa lawas ang biktima nga gilayon naman gindala sa ospital agud dapatan sang nagakaigo nga pagbulong.
Samtang, temporaryo naman nga ginkustodiya sa Roxas City Police Station si Ballos kag ang iya motorsiklo para sa nagakaigo nga disposisyon.
Mahibaluan nga yara sa idalom sang impluwensya sang makahulubog nga ilimnon si Ballos sang nagluntad ang insidente.
