ROXAS CITY – Masadya nga ginbaton sang pila ka mga senior citizens nagaedad 85- anyos pataas ang ila cash assistance nagikan sa LGU Jamindan.
Sa interview sang Bombo Radyo kay Hon. Mac Artur Valdemar, Alkalde sang Jamindan, ginpahayag sini nga ang nasambit nga assistance isa sa mga ordinansa sa ila banwa para sa dugang nga benepisyo sa katigulangan nga ginhatag sang gobyerno nasyunal partikular sang DSWD.
Ginsiling sang Alkalde, kapin P1.5 million ang budget subong nga tuig para sa programa kag halin ini sa ila national tax allocation sang ila LGU.
Suno diri, una na nga nakahatag sang benepisyo sa 84 senior citizens nagaedad 85- anyos pataas sa 1st quarter, 141 sang nakaligad nga semana, kag target sini ang 86 sa 3rd quarter kag 72 sa 4th quarter.
Paathag ni Mayor Valdemar, kun 85-89 ang age bracket, makabaton ang mga ini sang assistance sang isa ka beses subong nga tuig, apang sa masunod nga tuig kun mangin 90-anyos na makabaton sang dugang nga P10k, kun nagaedad naman 90-99 subong nga tuig makabaton ang mga ini sang P5k, sa masunod nga tuig kun mangin 95- anyos na makabaton sang dugang nga P15k kag kun mangin 100- anyos kag wala nakabaton subong nga tuig, makabaton naman sang P20k sa isa ka beses sa masunod nga tuig.
Dugang sini, ginpresentar ni SB Maria Tinneth Moises, SB on Social Services kun sa diin ginsuportahan man sang bug-os nga miyembro sang sangguniang bayan.
Luyag naman ipalab-ot ni Mayor sa concerned citizen natuhoy sa mga problema sa karsada ukon mga dalanon nga padayon nga nagatinguha ang ila LGU agud maimprobar ang ila dalanon kag madamo pa sila sang ordinansa para sa mga programa nga igahatag sa pumuluyo sang Jamindan.
