ROXAS CITY, CAPIZ- Madinalag-on nga na implementar sang mga kapulisan ang separado nga pagpatigayon sang search warrant implementation sa syudad sang Roxas, probinsya sang Capiz.
Ang nasambit nga search warrant implementation ang ginpatigayon sa Barangay Punta Tabuc, sa diin natigayon nga naaresto si alyas ‘Nene’, 35-anyos kag sa Barangay Banica, sa diin nadakpan man si alyas ‘Cobra’, 22-anyos.
Sa interview sang Bombo Radyo kay Police Lieutenant Colonel Ricardo Jomuad Jr., hepe sang Roxas City Police Station, iya ginpahayag nga madugay na nila nga ginamonitor ang mga arestdo antes ginapatigayon ang nasambit nga mga operasyon.
Nahibaluan nga ang mga arestado ang lunsay yara sa Barangay Anti-Drug Abuse Council (BADAC) watchlist.
Nakuha sa paghinakop ni alyas ‘Nene’ sang Barangay Punta Tabuc ang pito ka sachets sang ginapatihan shabu nga nagabalor sang P170,000, samtang, nakuha man sa paghinakop ni alyas ‘Cobra’ ang 38 ka sachets sang shabu nga nagabug-at sang 190 gramos kag nagabalor sang P1,290,000, drug paraphernalias kag walo ka mga bala sang armas-luthang.
Ang nasambit nga operasyon ginkasa pamaagi sa gintingub nga pwersa sang mga katapo sang Capiz Police Provincial Office – 1st Mobile Force Company, Philippine Drug Enforcement Agency (PDEA), Provincial Drug Enforcement Unit (PDEU) kag Roxas City Police Station.
Samtang, panugyan naman ni Jomuad sa publiko nga padayon nga makig angut sa mga kapulisan agud matapna ang mga ilegal nga aktibidad nga nagakahinabo sa palibot sang syudad.
Interviewed by Bombo Francis Biñas
