ROXAS CITY – Ginpaidalum na sa quarantine sa isa ka ospital sa Roxas City ang isa ka serbian national nga ikapito nga Patient Under Investigation (PUI) sang Coronavirus Disease 2019 (COVID)-19.
Ginkumpirma sang Provincial Health Office (PHO)-Capiz ang suspected case sang COVID-19 nga isa ka 80-anyos nga serbian national nga naga-estar sa Hong Kong sa sulod sang 40 ka tuig kag nag-abot sa Roxas City sini nga bulan para magbakasyon.
Nahibaluan nga nakaexperiensiya ang nasambit nga PUI sang pag-ubo, nga ginsundan sang lagnat kag kabudlayan sa pagginhawa.
Gilayon ini nga nagpadulong sa ospital para magpa-check up kag gin-abisuhan nga magpa-admit kag magpaidalum sa quarantine bangud gikan ini sa pungsod nga madamo sang narekord nga kaso sang COVID-19.
Natalana nga ipadala sa Research Institute for Tropical Medicine (RITM) ang specimen kasubong sang nasopharyngeal kag oropharyngeal swab nga ginkuha sa nasambit nga serbian national.
