ROXAS CITY-Natalana nga magpakigsapol ang Bise-Gobernador sang probinsiya sa bug-os nga Sangguniang Panlalawigan natuhoy sa posibilidad nga pagsaylo sa pagahiwatan sang Session kasunod sang patigayunon nga disinfection sa Provincial Capitol.
Sa interview sang Bombo Radyo kay Vice Governor James Mitang Magbanua ginpahayag sini nga may posibilidad nga mangita sila sang venue nga pagahiwatan sang ila regular session.
Suno kay Magbanua nga kinahanglan nga ma-protenihiran ang ikaayong lawas sang mga miyembro sang Sangguniang Panlalawigan.
Apang, gin-athag sini nga magapakigsapol pa ini sa konseho natuhoy sa panibag-o nga venue.
Samtang, gin-athag ni Magbanua nga wala pa ini nakabaton sang official explanation letter gikan kay Board Member Eleuper Martinez nga kapin sa lima ka bulan na wala maka-attend sa ila Regular Session matapos nga naka-lockdown sa Metro Manila.
Suno kay Magbanua nga ginkwestion ni Board Member Mateo Hachuela sang tinalikdan nga committee hearing ang madugay na nga absences ni Martinez.
Ginkompirmar man sini nga padayon sa gihapon nga nagabaton sang iya suweldo si Martinez apisar nga halos lima na ka-bulan nga wala makatambong sa ila regular session.
Apang gin-athag ni Magbanua nga ginhold sini ang iban nga mga allowances ni Martinez tubtob wala pa sang klaro nga explanation sa iya mga absences.
