ROXAS CITY – Nangin mainit ang ginpatigayon nga sesyon sang Sangguniang Panlungsod sang siyudad sang Roxas kaina sang hapon.
Ini kasunod sang pagpangabay ni City Councilor Cesar Yap Jr., ang chairman sang Committee on Health, Nutrition and Sanitation sa iya mga kaupdanan sa konseho nga magsunod sa health protocols kalakip na ang pagsuksok sang face mask.
Ginpahayag ni Yap nga may mga kaupdanan ini nga malaka lamang nagasuksok sang face mask sa ila nga sesyon.
Nagsabat naman si City Councilor Jericho Angel Celino nga indi man sa tanan nga oras kinahanglan gid nga magsuksok sang face mask ilabi pa nga naga-obserbar man sila sang physical distancing sa tagsa ka magpatigayon sila sang sesyon.
Apang ginpanindugan ni Yap nga kinahanglan nila magsundon sa health protocols agud maamligan indi lamang ang ila kaugalingon nga ikaayong-lawas kundi mangin ang ila makahalubilo batuk sa coronavirus disease (COVID-19).
Ginsegundahan man sang pila ka mga konsehal ang pahayag ni Yap kag sila ang nagkasugot nga dapat ang mga ini magsuksok sang face mask sa tagsa ka magpatigayon sang sesyon.
