ROXAS CITY – Nagpatigayon kahapon sang katapusan nga sesyon ang Sangguniang Panlalawigan kasunod sa pagtakup na sang termino ni outgoing Governor Antonio Del Rosario.
Nagtambong sanday outgoing Board Members Jeffrey Layo, Blesilda Ging-Ging Perez Almalbis, Roberto Ignacio kag Camilo Robles Board members elect Sonny Besa kag JR Tianco.
Wala naman nakatambong sa sesyon sanday Eduardo Magallanes, Ricky Martin, Karen Palomar, kag governor elect Esteban Nonoy Contreras.
Ginhatagan man sang kahigayunan ang mga outgoing board members nga nagtambong nga makahatag sang ila mensahe kag pagpasalamat.
Personal nga ginpasalamatan ni outgoing board member Almalbis ang mga kaupdanan sini sa ila nga pagsuporta sa iya kag sa pagkabig sa iya bilang abyan.
Nagserbi nga presiding officer sa nasambit nga sesyon si Layo.
Samtang, kadungan sang sesyon gin-aprubahan sang konseho ang 5.2 million pesos nga financial assistance gikan sa letter request ni outgoing Gov. del Rosario para sa ikaayo sang merkado publiko sa banwa sang Mambusao.
