ROXAS CITY- Nasentro sa isa ka frontliner kag sa iya pamilya ang short film nga ginhimo sang isa ka Capizeña film director nga ginpasakup sa Makata Indie Film Festival.
Ginpahayag ni Direk Quin Pacis tumandok sang banwa sang President Roxas, nga ang 5 minute short film nga may tigulo ‘’Burador” ginpasakup sa nasambit nga festival sa pro-category kag may topiko nga quarantine stories.
Katuyuan sa pagpasakup sini sa amo nga kumpetisyon nga makahatag sang inspirasyon kag mapakita ang sakripisyo nga ginahimo sang frontliners kag sang ila pamilya sa ginapangatubang nga COVID-19 pandemic.
Aminado man si Pacis nga madamo ini sang himata kag abyan nga mga frontliners nga nag-inspire sa iya para mahuman ang nasambit nga pelikula.
Wala man ini nabudlayan sa mga artista sang amo nga pelikula kasubong na lamang sa lead role nga isa ka anak nga ginportray sang iya nga manghod kag ang iban nga characters ang ila mga kasimaryo sa Barangay Hanglid.
Gindayaw man sini ang acting sang manghod nga sa pag-estorya pa lamang sini sang kaundan sang estorya sang Burador ang nagtulo na ang iya nga luha, bangud kasubong nga nadala ini sa estorya.
Para kay Pacis nga daku ang impact sang ginhimo nga short film bangud ginapakita sini ang nagakahinabo kag ang sitwasyon sa karon sa tunga sang frontliners kag sang ila pamilya nga ginseparar sang kahigayunan bangud sa kagustuhan sang mga frontliners nga makahatag sang serbisyo publiko agud malikawan ang paglapta sang makamamatay nga COVID-19 pandemic sa pihak nga nagapatimaan ini nga madulaan sila sang oras sa ila pamilya.
