ROXAS CITY – Tuman na lamang ang kalipay nga nabatyagan sang Capisnon Film Director matapos nga nalakip ang ginhimo nga short film sa Gawad Sining Short Film Festival 2020.
Ini ang ginpabutyag ni Quin Pacis sang mainterview sang Bombo Radyo.Suno kay Pacis nga indi man nangin mahapos ang ila naagihan antes nalakip ang ginhimo nga short film nga may tig-ulo nga “Amay Namon”.
Ginpahayag sini nga naka-sentro ang istorya sa tanan nga LGBTQ Community kun sa diin madamo sang mga matun-an ang mga tumalan-aw nagikan sa nasambit nga pelikula.
Dugang pa sini nga nabatyagan niya ang tanan nga suporta kag pangabudlay sang iya mga cast sa amo nga pelikula.
Mahibaluan nga naglab-ot sa duha ka adlaw ang ila nga pag-shoot kag madamo man sang mga pagtilaw ang ila naagiyan samtang ginahimo ang nasambit nga short film.
Apisar nga nangin mabudlay para sa ila apang yara sa gihapon ang ila pagsalig nga magapangingibabaw sa gihapon ang ila pelikula.
Daku na ini nga bulig para sa ila production team ang paglantaw sang mga tawo bilang balos man sa kabudlay nga ila naagihan antes malakip sa finalist.
Samtang, nagapanawagan naman ini sa mga Capizeño nga suportahan ang ila nga pelikula pinaagi sa paglantaw sa Gawad Sining YouTube Channel kag pangitaon lang ang ila pelikula.
Mahimo naman ini malantaw humalin sa Nobyermbre 27 tubtob Disyembre 4,2020.Mahibaluan nga ang nasambit nga short film ang nagaisahanon lamang nga entry nga nakasulod gikan sa Western Visayas.
Nagalaom naman ini nga makakuha sang nagkalain-lain nga mga awards ang amo nga pelikula.
