ROXAS CITY-Ginsabat ni Roxas City Mayor Ronnie Dadivas ang ginpapanaog nga show cause order ni Capiz Governor Esteban Evan Contreras.
Ini ang ginkompimar ni Dadivas sang mainterview sang Bombo Radyo.
Ginpahayag ni Dadivas nga wala sang kinamatarong ang gobernador nga magpapanaog sang show cause order batuk sa alkalde sang siyudad.
Suno kay Dadivas nga sandig sa Local Government Code of the Philippines, ang presidente sang pungsod pinaagi sa Department of the Interior and Local Government ukon DILG ang may yara lamang sang kinamatarung nga magpapanaug sang show cause order sa mga local chief executives.
Apang bilang respeto man sa gobernador, ginpakamaayo ni Dadivas nga magsabat sa nasambit nga show cause order.
Ginkakibot man sang amo nga alkalde ang ginhimo sang gobernador bangud wala man ini sang may ginhimo nga malain.
Ginpanindugan naman ni Dadivas nga indi na kinahanglan pa nga magpapanaog sang show cause order si Contreras sa baylo mas maayo nga communication letter ukon nagtawag na lamang ini sa iya.
Gin-athag ni Dadivas nga ginarecognisar man sini nga yara sa superbisyon sang probinsiya ang siyudad bilang component sini, apang ginpanindugan sang amo nga opisyal nga may yara man sang kaugalingon nga awtonomiya ang tagsa-tagsa.
Matandaan nga nagpapanaog sang show cause order si Contreras batuk kay Dadivas kasunod sang pagpamalabag sini sa barko nga natalana kuntani nga magdungka sa Culasi Port sakay ang kapin sa 53 ka mga LSI’s gikan sa Batangas Port.
