Sibilyan nga nagmulay, naghangkat sang away, ginsumbag kag ginli-ab ang isa ka pulis, ginpasakaan sang kaso

SAPIAN, CAPIZ – Ginpasakaan sang kaso ang isa ka sibilyan nga nagmulay kag naghangkat sang away sa isa ka katapo sang Sapian Municipal Police Station sa banwa sang Sapian, Capiz.

Nagapangatubang ang suspek nga si Antonio Baloloy, 51 anyos sang Barangay Damayan, Sapian sa kaso nga Direct Assault matapos ginmulay kag ginli-ab pa si Police Master Sergeant Wilmer Peral.

Suno kay Peral, samtang yara ini sa duty sa border control checkpoint, nagpangayo sang responde si Geraldine Dela Cruz kag menor-de-edad sini nga anak matapos nagtuyo nga magpanglabo ang suspek.

Gilayon man ini nga nagresponde apang sa baylo nga magsunod si Baloloy, nagbato ini sa pulis kag iya pa ini nga ginsumbag.

Bangud diri, gin-aresto si Baloloy kag ginpasakaan sang kaso.