ROXAS CITY, CAPIZ- Ginpahamtang na sa sulod sang merkado publiko, Teodoro Arcenas Trade Center (TATC), Roxas City ang mga sidewalk vendors.
Sa interview sang Bombo Radyo kay Mr. Gonzalo Andrada, Head sang Traffic Management Unit-Roxas City, ginpahayag nga pamaagi sa koordinasyon nila sa market administrator sang TATC, natigayon na nga napasulod ang mga sidewalk vendors kun sa diin isa sa mga rason sang pag traffic sa amo nga lugar.
Dugang pa sini, nga umpisa nga napahamtang na sa sulod ang mga sidewalk vendors, nabatyagan na ang paghagan-hagan sang dalagan sang trapiko sa amo nga merkado.
Sa pihak nga bahin, magluwas sa mga sidewalk vendors nga nagatuga sang trapiko, isa man diri ang pila ka mga motorista nga ginahimo parking area ang kuntani alagyan pa sang mga nagadalalagan nga behikulo kag ang mga nagapundo sa mga loading kag unloading points.
Isa man sa nagatuga pagid sang trapiko amo ang mga parking boys sa merkado, bangud suno kay Gonzaga, wala ini sang ihibalo pag-abot sa pagmanihar sang dalagan sang trapiko kag nagapabasta lang.
Nahibaluan nga sa 10 ka-tuig na nga obserbasyon sang dalagan sang trapiko sa merkado, karon palang kag nag hagan-hagan.
Samtang, nagpalab-ot man si Gonzalo sa publiko nga importante ang kooperasyon sang tagsa-tagsa – motorista, vendors, kag mga bumalakal sa merkado nga kuntani sundon ang mga ginapatuman sang ila nga talatapan may kaangtanan sa pagpaayo sang dalagan sang trapiko sa amo nga merkado.
